لاتحن للحب الأول..واعطِ زوجتك الحب كله!

أحلام واقعية- ندى العمر


أكبر مشكلة بتواجه الراجل بعد الجواز الحنين للحب الأول، ويبدأ ينغص حياته وحياة مراته، بالرغم إنه هو اللي مختار مراته؛ ولكن يبدأ الشيطان يصورله إنه مش سعيد إنه لو كان أتجوز حبه القديم حيبقى أسعد!
ويبدأ يشوف مراته وكأنها عفريت، ويتلكك على كل صغيرة وكبيرة، وحياتهم تبدأ جحيم.

سؤال صغير أيًا كان الحب القديم السبب إنهم ميكونوش نصيب لبعض، أيه ذنب الإنسانة ربنا جعلها نصيبك، دي أكبر مشكلة إننا بنحلم أحلام ساعات وهمية!

معناه أيه معناه إن السعادة ممكن تكون في أيدينا وإحنا فاكرين إنها راحت مننا،الرضا بالمكتوب أول طريق للسعادة.

مثلًا الراجل بينه وبين نفسه يقول"أنا ايه خلاني استعجل"، ويبدأ يفكر إنه غلط غلطة عمرة وإن حرمانه من الحب الأول شىء صعب ويبدأ يفكر في الماضي، فحين أن ممكن تكون زوجته اللي اختارها"اختيار إجباري" علشان ينسى الحب الأول أو "أختيار تقليدي" علشان زن الأهل ويكون أسرة هو الجحيم في حد ذاته لأن جروح الحب الماضي لازالت في قلبه.


هو سؤال صغير اللي اختارها دي ذنبها أيه في صراعه اللي منتهاش وأخذها دواء لجروحه، وكأي فتاة بترسم شريك الحياة الفارس اللي هي فخورة أنه اختارها ، والراجل يرسم الدور حلو أوي ويعيشه.

ونسمع مشاكل كتيرة لجوزات كتير تلخص جملة"اكتشف إني مبحبهاش" يخرب بيته ويجرح قلب اختاره، ولو فيه أطفال يحصل نوع من التفكك.

وفي الحقيقة إن لو اهتم وحب مراته وشاف مميزاتها وتقبل عيوبها زي ماهي متقبله عيوبة ويتخاف على مشاعره، هيكتشف إن اختيارات ربنا أفضل بكتير جدًا.
ربنا مبيظلمش حد ...الوهم إننا نفضل نحلم بشىء ربنا بعده عنا ونفضل نقول سعادتنا معاه ..والسعادة معانا ومش عارفين قميتها!

كلمة بسيطة لكل راجل حب مراتك، واهتم بيها، وافتكر إنها كانت فخورة بوجودك في حياتها يوم مااتقدمتلها واهدتك قلبها علشان تفرح بيه في الحلال، متخليش حنينك للماضي يبقى سبب في جحيم قلب اختارك ..قلب ملوش ذنب !