التجاوزات بين المخطوبين تؤدي إلى نتائج وخيمه!

أحلام واقعية- ندى العمر

نسمع كثيرًا في الفترة الأخيرة عن خطوبات أنتهت بمحاضر في الأقسام من قبل العروسين سواء  العروسة وأهلها بابتزاز العريس  للعروس بصورهم أو خلاف على الشبكة وردها للعريس وأهله، و رفض أهل العروس استرجاعها كتعويض على فترة خطبتهم لأبنتهم،  يبدأ الخلاف يدور من له أحقية في الشبكة والهدايا فكل عائلة تبحث عن حيلة لصالحها فيزيد الخلاف،  ويبدأون في سباب بعضهم أو اللجوء لحيل غير أخلاقية كأختراق الصفحة الشخصية للعروسة  على مواقع التواصل الاجتماعي أو ابتزازها بالصور المأخوذة أيام الخطوبة.

الخطوبة ماهي إلا وعد بالزواج، الخطوبة فترة تعارف مش تغارف، فترة دراسة الطباع والسمات الشخصية،  مهم جدًا إن العروسة تفهم ده سواء خطوبة عن حب أو تقليدي فهو يعتبر راجل غريب، يعني لاينفع مسك أيد، ولاكلام الحب في التليفونات في أوقات متأخرة، ولاصور عمال على بطال سواء بملابس البيت أو بدون الحجاب لو محجبة، ولو مش محجبة صورك تبرز جمالك ميصحش، الخروج الكتير بدون وجود حد من أهلكم بلاش.

إيه العقد دي ..أنتي عايزة يقول عليه معقدة؟!

ده مش عقد نهائي، فيه بعض الرجال تأخذ الخطوبة سكة لإشباع رغباتهم، ده مش جوزك، مينفعش يبقى بينكم تجاوز؛ لأن نتائجه وخيمه جدًا، ناس كتير أتخدعت في الراجل اللي بيتقدم لبناتهم، وفجاءة بيبقى فص ملح وداب يأما بيستغلهم ماديًا أو نفسيًا.

الراجل المتقدم للزواج يستغل حالة العطش والفراخ العاطفي للبنت هو بيبقى شاطر بكلماته المعسولة،  يبني ليها قصور من الوهم بحجة إن هو خلاص هيبقى شريكها.

 حافظي على قلبك، ونفسك، محدش هينفعك الصح أعرفيه، واعمليه، واللي يشوفك معقده ابعديه، العقدة الحقيقية التجاوزات اللي بنسمع عنها في الخطوبة بين الشاب والفتاة، ويشتكوا بعد الجواز ليه الحياة بقت  معقدة؟!

 ولو لقدر الله مكملتش الجوازة؛ هتسترخصي نفسك، وقلبك هتلاقيه مجروح.

انتقي لبسك، وحديثك، ادرسيه كويس، خلي مابينكم حدود واحترام، اسألي عنه، وعن شغله، لو لاقيتي بيتكلم عن أحاديث خارجة حولي الحديث لحديث أخر، إذا استمر أفهمي سكته إيه !