الراجل المصدوم عاطفيًا.. قد يتحول من ضحية لمنتقم!

أحلام واقعية- ندى العمر

حالة توهان..انطواء..حزن مفرط، كره لأغاني الحب، وسيرته حالة طبيعية يمر بها الراجل بعد خيانته بل يصل الأمر لكراهية كافة النساء والأنتقام منهن، المرأة حينما تخان من شريكها عكس الراجل تمامًا، المرأة تستطيع أن تتجاوز المحنة والإبتلاء إنما الراجل يشعر بدمار في عاطفته وكرامته.

مفهوم الخيانة بيختلف مينفعش تكون كنت بتحب واحدة مفيش رباط شرعي بينكم كخطوبة أو زواج وتقول أصلها خانتني وخطبت غيري ..بداية الحب  الذي لاينتهج الخطوات الصحيحة يبقى مفيش نصيب من البداية، دايمًا البنت بتميل للاستقرار، للطريق الصح، بتشوف إن الطريق الصح رضا ربنا في النور حتى ولو ده ضد إرادة قلبها المهم يبقى في الحلال.

 سكة الحب الجواز غير كده تسلية ، بنسمع كتير رجالة تقولك حبيبتي خانتني واتخطبت لغيري ..أنت خونت ثقة ربنا مقدمتش خطوات ترضى ربنا، بلاش نضحك على نفسنا اللي بيحب بجد بيخاف ربنا بيخاف على  اللي بيحبه، فيه نماذج رجالة كتير حبت وبعدت لغاية ماتكون جاهزة علشان توصل بدون غضب ربنا حتى لو محصلش نصيب، رضيوا بقضاء الله وشافوا حياتهم بالحلال وحبوا وعاشوا الحياة مش بتقف. 

نيجي لموضوعنا الخيانة بمعناها الحقيقي واحد خطب واحدة والواحدة دي حبت واحد تاني أو كانت بتاخده كوبري علشان اللي كانت بتحبه يرجعلها أو طمع في ماله أو منصبه أكتشف كده  وفسخ الخطوبة واطعن في قلبه؛ لأنه حبها ومبقاش عنده ثقه في نفسه ولا في الحب ولا الستات وقرر ينتقم أو قرر يعزف عن الحب والزواج.

ولا أي كلمة مواساة تنفع في الموقف ده لازم تعيش مشاعر الوجع؛ ولكن  حاول شوفها بشكل تاني إبتلاء وحب من ربنا إن كشفلك حقيقة مزيفة ووهم كنت عايش فيه، الخروج والتعافي من الأزمة محتاج وقت لاطبيب نفسي ولا أي بشر هيقدر يطيب الجرح الصعب ده غير إنك تقرب لربنا هو قادر يطيب قلبك، قادر ينسيك الوجع.

تنسى إزاي؟!

محتاج تدعم ثقتك بنفسك وتقول:"أنا ربنا بيحبني، وبعدني عن قلوب ناس متنسبنيش، الحياة قدامي، بكرة هلاقي واحدة تحبني زي ماحبيت، قدامي شغلي وحياتي، ربنا نجاني من شر أكبر من شر كنت هبقى فيه، حواليه كتير بيحبوني"

عيط لو عايز تعيط مش عيب..اشغل وقتك بالصلاة، وهواياتك، والخروج ،والشغل ، اعتبره درس ولسه مرحلة الحب الحقيقي مجتش.

والله الحكاية عاملة زي اللي كان هيروح النار برجليه وربنا نجاة وحفظه ، ثق إن عوض  ربنا أكبر هيكون قد صبرك.

إياك أن تنتقم من نفسك وتبدأ تحب أي واحدة وتخطب وتتجوز هتظلم غيرك،  أو تفتكر حبيبتك القديمة اللي سبتها هتبقى بداية مظلمة هتزيد من صدماتك لأن مشاعرك في حالة اصطدام، اعتبر إن قلبك أتولد من جديد هتحب وهتتجوز حد أنت بالنسبة ليه كل حاجة ، ولاتحتال وتلعب بمشاعر البنات علشان ترضي غرورك، وتنتقم من وجع صدمتك في مشاعر غيرك.

 خليك ناصح، وقوي أفتكر قد ايه ربنا شيلك حاجة أكبر من اللي راح عايزتنتقم بجد  أفضل انتقام إنك تكون في أفضل حال، وإنك تعيش حياتك ولاتدع لجرح أو وجع من أحد يترك أثر عليك.