لاتكوني كوبري من أجل مصالحهم ...زواج من أجل المصلحة من قبل "الوسطاء"!

أحلام واقعية- ندى العمر

على رأي المثل"إن كان فيه الخير مكنش رماه الطير" والمثل الآخر" الحداية مبتحدفش كتاكيت"، "زغرتي  ياللى مش غرمانه" 

أمثال شعبية أثبتت واقعيتها في حياتنا لما حد من اقاربك، أصحابك، ومعارفك أيا كان يجبلك عريس ويفضل يقول مميزات لحد الصبح ولو بس فكرتي إنك ترفضي يبقى خسرتي فرصة العمر، وإن رفضتي يبدأوا يطلعوا فيكي عيوب الدنيا كلها وأنك مفترية أو في حد في حياتك ومخبيه أو هتعنسي وهتبقي غير صالحة للجوازو تتجوزي أي حد، وتبدأ عمليات الضغط النفسي على الأهل والفتاة تفتكروا الناس دي بتعمل كده ليه أغلبهم بيبقوا قريبين جدًا منكم طب ما أولى لو الشخص ده فرصة ياخدوه لبناتهم مش هنكر فعلا إن فيه ناس بتسعى للخير وبدون مقابل؛ ولكن الأغلب بياخدوا من ورا جوازكم أما مصالح مادية أو معنوية أو استثمارات يعني أنتي مجرد كوبري لمصلحة بين العريس أو أهلة والوسيط فهمتي ليه كل الزن و الضغط النفسي بالكلام علشان تضعفي أنتي وأهلك ويفضلوا يسهلوا عليكم كل حاجة ويبنوا لكم قصور من رمل ويفضلوا يدافعوا عن العريس كأنه ابنهم والمفترض أنك قريبتهم!

كلام للبنات وأهلهم مفيش حد إلا وهياخد  24 قيراط مفهاش مشكلة تشوفوه لعل وعسى يكون ابن حلال؛ ولكن تحروا الدقة أغلب الجوازات زي كده الوسيط هو بيكون حد  من أقرب الناس  كل يهمهم مصلحتهم ، بسمع بنات بتقول قربنا أو قريبتنا جابولنا عريس وبنثق فيهم ونكتشف بعد الجواز كل الكلام اللي اتقال كذب وكنا مجرد صفقة مش أكتر!

للأهل تحروا الدقة في الخاطب وأهله، ولا تستعجلوا، ولا تسمحوا للوسيط بالتدخل أو الكذب وخداع الطرف الآخر، لا تضعفوا أمام كلام الآخرين ولا تجعلوا الثقة الزائدة في الوسيط تخليكم  ترموا بناتكم في التهلكة.

للبنات خليكي واعية وناضجة حتى لو هتوافقي على الرؤية الشرعية ومش مرتاحه أو لقيتي كلام العريس فيه مطامع أو كذب أو خداع ارفضي ولا تسمحي بأحد يحدد مصير حياتك، وتأكدي إن ربنا شايلك خير.

متسمحيش لحد  يخليكي  كوبري يحقق من وراكي صفقة  مقبوضة التمن، هتكتشفي ده بعدين وهتندمي أشد الندم.

"ما أود أن أقوله لا تسمحوا لأحد أن يتدخل  في مستقبلكم ولا بحياتكم ولا تثقوا في اختيار أحد بل من المفترض إن الاختيار من قبلكم".